Gaur, abenduak 3, Euskararen Nazioarteko Eguna ospatzen dugu, egun berezia euskaldunontzat. Ba al dakizue egun honen jatorria? Gaur ere, Frantzisko Xabierkoaren eguna da. Frantzisko 1552ko abenduaren 3an hil zen, eta, kondairak dioenez, hil aurreko azken hitzak bere ama-hizkuntzan izan ziren, euskaraz!!
1949an Eusko Ikaskuntzak ezarri zuen egun hau euskararen nazioarteko egun gisara. 1995ean Eusko Jaurlaritzak eta Euskaltzaindiak bat eginik, Euskararen Nazioarteko Eguna instituzionalizatu zuten.
Gure hizkuntzaren historiari buruzko informazioa bilatuz gero, dexente aurkituko dugu baina hori guztia biltzen duen bideoa txertatzen dugu jarraian hainbat bitxikeri ikas ditzazuen. Adi egon!!
Arretaz entzun baduzue, ziur euskarari buruzko gauza berri asko ikasi dituzuela, ezta? Hala ere, gehiago jakin eta ikasi nahi baduzue, Bilboko San Inazio auzoan dagoen Euskararen Etxera hurbil zaitezkete eta bideoaren amaieran aipatutako trena bisita dezakezue. Hango erakusketak hiru gune nagusi ditu:
Harrera gunea: Euskararen Misterioa dokumentalarekin ongi etorria ematen zaie bisitariei. Euskararen jatorri ezezaguna edota hizkuntzaren bilakaera zenbait pertsonaia ezagun eta ezezagunek emandako sarrera propioekin dira edukietako batzuk.
Tren-geltokia: Euskara, bat eta asko eta Euskara, atzo eta gaur: Tren geltoki baten antzera girotuta dagoen gune honetan dauden bi trenen izenak dira. Tren bakoitzak gai nagusi bat jorratzen du. Lehenengoa euskal hizkuntza etaeuskalkiei buruz dihardu eta bigarrena euskararen historiaz, antzinatetik gaurdaino.
Euskara munduan: euskara hizkuntza bidaiaria izan da. Horren froga bizia dira munduan zehar topa daitezkeen euskararen testigantzak: mundu osoko eusko etxeak, eta euskara edo euskal kultura irakasgai dituzten unibertsitateak.
Ofizialki, azaroaren 30ean Euskararen Nazioarteko Egunaren adierazpen instituzionala aurkeztu zen Euskadiko Artxibo Historikoan (Bilbo). Aurkeztu zen testua ondorengo erakundeen artean adostu eta idatzi da: Eusko Jaurlaritza, Arabako Foru Aldundia, Bizkaiko Foru Aldundia, Gipuzkoako Foru Aldundia, Bilboko Udala, Donostiako Udala, Gasteizko Udala eta EUDEL (denak dira HAKOBAko kideak). Aurtengo adierazpen instituzionalak euskaldun berriak omendu nahi ditu.
Hurrengo bihotzak euskaldun berrien izenez osaturik dago, zeurea utzi nahi izanez gero, irudian sakatu!
Hona hemen euskaldun berri baten kasu bitxia, andaluziar batena, Reyes Pradosena hain zuzen ere! Entzun arretaz:
Ziur harrigarria iruditu zaizuela bideoa. Zelan da posible urte bakar batean, aldez aurretik ezer jakin barik, hain ondo mintzatzea? Hainbat erantzun datozkit burura: gogoa, jakinmina, maitasuna, aberastasuna, gainditze grina... Zer deritzezue?
Amaitu baino lehen, euskara hizkuntzarekin lotutako irudien collage-a uzten dizuegu hemen:
Eraman dezagun euskara bihotzetik ezpainetara. Euskaldunok euskaraz!
Zer egin dezakegu guk euskara zabaltzeko gal ez dadin? Uste duzue gure esku dagoela zeozer?
Blog honetan beti gabiltza euskararen bitxikeriak argitaratzen. Gaur, bilduma dotorea ekartzen dizuegu sarean euskara erabili ahal izateko.
Iazko Euskararen Nazioarteko Egunaren kanpainarako ekimen polita jarri zen martxan: ahalik eta hitz gehien euskaraz ahozkatzea forvo.com webgunean. Iazko kontua izan arren, jarrai daiteke parte hartzen eta euskara sarean zabaltzen. Animatzen zarete?
Dakizuenez, online hiztegiak daude, hurrengo loruran geure alboko barran daudenez gain hiztegi gehiago topa ditzakezu.
Zeuen idazlanetan akats gutxiago izateko Xuxen zuzentzaile ortografikoa eskura duzue. Doakoa da eta ordenagailuan instala dezakezue zalantza ortografikoak argitzeko.
Baina gaur elkarbanatu nahi dugun guztia, ez dago eskolako kontuekin lotuta. Esaterako, bazenekien sare-sozial euskaldunak ere existitzen direla? Mintzatu.com-en aurki, partekatu eta zabaldu dezakezu non erabili euskara munduko edozein tokitan. Hurrengo bideoan primeran azaltzen dute, adi!!
On-line jolasak ere badaude, irudian sakatuz gero jolasteko aukera izango duzue.
Smartphonetarako eta tabletetarako aplikazioak euskaraz ere existitzen dira, hurrengo loturan euskara ikasteko aplikazio zerrenda luzea duzue eta beste honetan aplikazioak euskaraz.
Bideojokuen zaleentzat sustatu web orrialdean aurkitutako albistea luzatzen dizuegu: Wii U kontsolarako euskarazko lehen jokoa salgai dago dagoeneko: Aliceren ibaiak, abentura grafikoa. Izatez, kontsola jakin baterako euskaraz dagoen lehenbiziko jokoa da. Android eta iOS sistemetarako ere badago. Joko honetan, Alice lotara doa, eta ametsetan hasten da. Amets hauetan bere beldurrei egingo die aurre, horretarako bere ametsan dauden elementuekin elkarrekintzan ibiliko da. Bere ametsean jende desberdina topatuko du, eta hainbat puzzle ebatzi beharko ditu. Gustatu bazaizue eta Olentzeroren gutuna ez baduzue idatzi dagoeneko, badakizue!!
EITBk zinema euskaraz eskura jartzen digu. Haur, gazte eta helduentzako hainbat film ikusgai daude. Badago beste helbide bat, hainbat telesail eta film deskargatu ahal izateko, hurrengo loturan eskugarri daukazue.
Gazteentzako Euskal Herri osora hedatzen den euskara hutsezko hilabetekaria duzue Gaztezulo. Euskal komikiak ere ditugu eskura sarean, sakatu hurrengo lotura eta ikusi!!
Ikusten duzuenez, aukera anitzak dira euskara sarean erabili ahal izatekoak eta konprobatu ahal izan duzuenez, ez bakarrik eskolako kontuekin lotuta!! Beraz, hemendik aurrera, post honetan luzatutako lotura eta baliabide guztiekin ez daukazue sarean euskaran murgiltzeko aitzakiarik!!
Kasualitatea ala ez, gaur, Santa Cecilia egunean, musikarien egunean hain zuzen, Oskorrik, Natxo de Felipe buru izanik, euskal musika herrikoia landu duen talderik beteranoenak, atzean utziko ditu agertokiak bere azken kontzertuak eskainiz Bilbon.
45 urtean zehar Euskal Herri guztian barrena euskal musika zabaldu duen taldeko kide direnek euren ibilbideari amaiera eman diote udazkenean zehar eman dituzten zenbait kontzerturekin, Hauxe da despedidia izeneko biraren barnean.
Oskorrik milaka eta milaka kilometro pilatu ditu errepidean, eta beste horrenbeste ordu bidaietan eta entseguetan, eta horien guztien emaitza 3.000tik gora kontzertu ematea eta ia 500 kantu grabatzea izan dira.
Bandak abesti berriak sortu eta antzinako testuak musikatu ditu "aurreiritzi gabe" eta era guztietako generoak uztartuz, pop-, rock- zein jazz-musika izan, eta plazarik plaza defendatu ditu.
Berriro ere Poziktibityra jotzen dugu albiste hau ekartzeko: 2014an kaleratu ziren 783 domeinuen artean, .eus 4. onena izendatu dute, kalitate eta SEO rankingetan. Gainera, domeinu hau erabiltzen duten webguneen konfiantza-fluxua ere aztertu da, eta hala, eitb.eus, berria.eus eta argia.eus top 20an daude.
Blog hau estreinatu genuen geure hizkuntzako film bati buruzko berriarekin. Gaur, hilabete beranduago, honako albiste hau topatu dugu EITBren webgunean: "'Loreak' filma New Yorkeko zinema-areto batean estreinatu da. Oscarretarako lehian ari den euskarazko film horrek bertako kritika oso onak jaso ditu."
Atzo, urriak 20, kaleratu zuten Asterix eta Obelixen abentura berria, ‘Le Papyrus de César’ albuma, bilduma guztiaren 36.a. 4 milioi ale kaleratuko dira, 20 hizkuntzatan, eta ale horietako 4.000 euskaraz izango dira. Data hau hautatu izanaren arrazoia argia da, izan ere, datorren astean Asterixek 56 urte beteko ditu. Albuma gaztelaniaz, galegoz, katalanez eta bablez ere irakurri ahal izango dira.
Urte dezente pasa badira ere René Gosciny sortzailea zendu zenetik, album honen egile Jean-Yves Ferri eta Didier Conrad saiatu dira hasierako ukitua mantentzen. Eta lehenengo orriak irakurri ahal izan dituztenek, nahiko ondo lortu dutela esan dute.
Euskararekin lotutako albistea aurkituko dugu gaur edozein egunkaritan. Loreak izeneko filmak Oscar sari ospetsuetan parte hartuko du. Lehen aldia da euskarazko pelikula bat aurkezten dena eta hori, gure kulturarako oso urrats inportantea da.
Zuzendarien ametsa pelikula honekin saria lortzea da eta horrela munduko edozein lekutara iristea. Ez da bat ere erreza izango ibilbidea, 80 film ingeleraz ez direnak parte hartuko dute atal honetan eta. Horregatik hasi dira indar handiz lehenengo momentutik munduari zabaltzen eta erakusten egindako lan itzela. Orain arte hainbat zinemalditan parte hartu dute eta arrakasta lortzen ari da. Lortuko al dute azkenean amerikar saria etxera ekartzea? Hori jakiteko otsailaren 28ra arte itxaron beharko dugu...
Jarraian filmaren webgunea luzatzen dizuegu gehiahiago jakin nahi izanez gero sartzeko, baita trailer ofiziala ere bai. Zuen gustukoa izatea espero dugu.
